बॉर्न२विन ही उद्योगप्रवणतेचे धडे देणारी, त्यासाठी प्रोत्साहित करणारी संस्था. संस्थेचा “लक्ष्यवेध” अभ्यासक्रम पूर्ण केलेल्या व्यक्तींना सन्मानित करण्यासाठी “लक्ष्यसिध्दी” कार्यक्रम आयोजित केला जातो. या कार्यक्रमात कर्तृत्वान व्यक्तींना आमंत्रित करून त्यांचा मार्गदर्शनाचा लाभही दिला जातो. बॉर्न२विनचे प्रमुख अतुल राजोळी यांनी आतापर्यंत कॉर्पोरेट लॉयर नितीन पोतदार, एल अॅन्ड टीचे संचालक वाय.एम. देवस्थळी, पितांबरीचे सी.एम.डी. रवींद्र प्रभुदेसाई अशा काही मान्यवरांना या कार्यक्रमात आणले होते. २३ मे २०११ च्या लक्ष्यसिध्दी सोहळ्यात यावेळेस डॉ. उदय निरगुडकर हे प्रमुख पाहुणे होते. ते आपल्यला माहित आहेत ते बीपीओ- आयटी उद्योगातील तज्ज्ञ, निवडणूक तज्ज्ञ, लेखक म्हणून. लक्ष्यसिध्दी सोहळ्यातील त्यांचे व्याख्यान ऐकून त्यांना आणखी एक उपाधी देता येईल ती म्हणजे, तरूणांना हसत-खेळत मार्गदर्शन करणारे वक्ते!
लक्ष्यवेधच्या प्रशिक्षणार्थ्यांचा लक्ष्यसिध्दी पुरस्कार देउन गौरव करण्यात आला
डॉ. उदय निरगुडकर सुरवात करताना म्हणाले, 'तुम्हाला प्रशिक्षण घ्यावे वाटले हेच खास आहे कारण करवतीला धार करत राहणे आवश्यक असते. आज जग झपाट्याने बदलत आहे, व्यावसायिक कौशल्ये कालबाह्य होत आहेत, स्पर्धा जागतिक आहे. औषधे विकत घेताना जसे आपण एक्सपायरीची तारीख बघून घेतो, तसे शिक्षणावरचीही एक्सपायरीची तारीख बघितली पाहिजे. काहीवेळा तर आपण जे शिकलो आहोत ते “अनलर्न” करावे लागेल. आजचा काळ हा स्ट्रॅटेजिक अॅडव्हान्समेंटचा आहे. याचा लाभ घ्यायला हवा. त्यासाठी नियोजन हवे, चलता है वृत्ती नको. खंबीर मन हवे, घेतलेला निर्णय अंमलात आणता यायला हवा, ज्ञानलालसा हवी!' अशा अनेक बाबी त्यांनी दृष्टांत देत सांगितल्या.
डॉल्फिन युनिसेस प्रायवेट लिमिटेडचे पुष्कर व हंसा मंत्री यांना त्यांच्या उल्लेखनिय कामगिरी बद्दल पुरस्कृत करण्यात आले.
स्वत:चे SWOT analysis म्हणजे इनट्रॉस्पेक्शन - आत्मपरिक्षण करा. आपली शक्तीस्थाने, कमजोरी काय आहेत दोन्ही जाणून घ्या, काय करायचे आहे त्याचा विचार करा. कंपनीला व्हिजन स्टेटमेंट असते, तसे प्रत्येक व्यक्तीलाही व्हिजन स्टेटमेंट हवे. कंपन्यांचा विकास होत असतो, त्या प्रगतीपथावर असतात, कारण त्यांच्याकडे जे प्रॉडक्ट असते, त्याची विक्री दरवर्षी वाढत असते. ही विक्री काहीवेळा अफाट वाढते कारण, त्या प्रॉडक्टमध्ये ते “व्हॅल्यू अॅडिशन” करतात म्हणजे त्याची मूल्यवृध्दी करतात. मूल्यवृध्दी याचा अर्थ किंमत वाढवणे नाही तर त्या प्रॉडक्टपासून ग्राहकांना मिळणार्‍या लाभात वाढ होणे. एक उदाहरण द्यायचे तर आधी साधे मोबाइल फोन होते. आता त्यावर इंटरनेट सर्फींग करता येते. केवढी मोठी सोय. प्रवासात किंवा कोठेही स्टॉक मार्केटची माहिती, रेल्वे आरक्षणाची माहिती मोबाइलवर इंटरनेटद्वारे मिळू शकते. लोक जुना मोबाइल टाकून नवा घेणार. निरगुडकर सांगतात प्रत्येकाचे आयुष्य हाही मूल्यवृध्दीचा प्रवास आहे व असायला हवा. त्यासाठी प्रत्येकाने प्रयत्न करायला हवेत. बेंचमार्किंगची कसोटी लावायला हवी. बेंचमार्क म्हणजे एका स्टॅन्डर्ड प्रमाणकाबरोबर तुलना करणे. तसेच प्रत्येकाकडे व्हिजन हवी, त्याचसह त्यासाठी कृतीही करायला हवी. नाहीतर ठरवलेली ध्येये प्रत्यक्षात उतरणार नाहीत.
डॉ. उदय निरगुडकर उपस्थित प्रेक्षकांना मार्गदर्शन करताना
कोणकोणत्या गोष्टी टाळाव्या याबाबत निरगुडकर म्हणाले, नाऊमेद करणार्‍या अनेक गोष्टी घडत असतात, पण त्याला बळी पडू नये. निसर्गाने प्रत्येकाला काही गुण दिलेले आहेत. नैराश्याची शिकार होऊ नका, विफलतेची भावना मनात नको. अयशस्वी झाल्यावर किंवा मागे पडल्यावर पक्षपात झाला - केला गेला अशी भावना मनात येऊ शकते. अन्याय झाला वाटू शकते. अशा भावनांना अजिबात थारा देऊ नका. उलट जिगर दाखवा. यशस्वी व्यक्तीला यश का मिळाले याचा अभ्यास करा. जगातील सर्वोत्तम गोष्टीतून काय घ्यायचे त्याला महत्व आहे. तसेच एकाकीपण हा घातक असतो. त्यापासून दूर राहा. आयुष्यात रीलॅक्स व्हायला शिका. तणावमुक्त असल्याशिवाय काही साध्य करता येणार नाही.
डॉ. उदय निरगुडकरांचे व्याख्यान भलतेच रंगात आले होते.
देशाला महासत्ता बनवायचे असेल तर फक्त दोनच व्यक्ती ते काम करू शकतात – “तुम्ही आणि मी” हा मुद्दा त्यांनी आकर्षकपणे ठसवला.
भाषणातील मुद्दे उदाहरणे देत, विनोद पेरत, नाट्यपूर्ण रीतीने सांगत, त्यांनी श्रोत्यांची मने जिंकली. त्यांच्या भाषणानंतर उपस्थितांनी ऊभे राहून टाळ्या वाजवत त्यांना दाद दिली.
डॉ. उदय निरगुडकर यांच्या "बॉर्न टु विन" या जबरदस्त प्रेरणादायी व्याख्यानाची सिडी आपणास हवी असल्यास कृपया संपर्क साधा: ०२२-२२९३९३७५/६/७/८, ७६६६४२६६५४, ९६१९४६५६८९
सौजन्यः उदय कुलकर्णी ९८६९६ ७२६९६
